Në vijim të hetimeve për aksidentin tragjik të ndodhur më 19 mars 2025, në segmentin rrugor “Vorë – Fushë Krujë”, Policia ka arrestuar katër persona të lidhur me ngjarjen, ku humbën jetën 4 persona.
Në orët e vona të mbrëmjes, një automjet tip “Mercedes Benz”, i drejtuar nga shtetasi Enejd Laçi (25 vjeç), dyshohet se ka goditur nga pas një betoniere që kishte ndaluar në karrexhatë. Si pasojë e përplasjes, automjeti ka shpërthyer dhe ka përfshirë në flakë drejtuesin dhe pasagjerët e tij, të cilët humbën jetën. Drejtuesi i betonieres, shtetasi Aleksandër Krrashi (24 vjeç), është larguar nga vendi i aksidentit.
Pas veprimeve hetimore, janë arrestuar:
Aleksandër Krrashi, drejtuesi i betonieres, për veprat penale “Shkelja e rregullave të qarkullimit rrugor”, “Drejtimi i automjetit në mënyrë të parregullt” dhe “Largimi nga vendi i aksidentit”;
Valentin Krrashi, i afërm i Aleksandër Krrashi, për “Përkrahja e autorit të krimit” dhe “Veprime që pengojnë zbulimin e së vërtetës”;
Danjel Koxha, menaxher i firmës që prodhon betonin, për “Shkelja e rregullave të qarkullimit rrugor”, “Shkelja e rregullave të mbrojtjes në punë”, “Punësimi i paligjshëm” dhe “Fshehja e të ardhurave”.
Për administratorin e firmës, S. H., është shpallur një kërkim dhe po punohet për kapjen e tij.
Prokuroria e Tiranës po vijon hetimet për zbardhjen e plotë të ngjarjes.
