Ish-ministri i Jashtëm, Ditmir Bushati, ka shprehur kritika të ashpra ndaj institucioneve shqiptare për neglizhencën e tyre në përkujtimin e 100-vjetorit të vrasjes së figurës kombëtare, Luigj Gurakuqi.
Në një reagim të gjatë në Facebook, ai thekson se për këtë përvjetor u kujdesën vetëm Bashkia dhe Universiteti i Barit në Itali, ndërsa në Shqipëri kaloi pa vëmendje. Me ironi, Bushati sugjeron sesi ky përvjetor mund të ishte shfrytëzuar për nisma madhore në fushën e arsimit dhe historisë. Ai propozon një vit mbarëkombëtar në emër të Gurakuqit, një bashkëpunim mes qeverive të Shqipërisë dhe Kosovës për promovimin e dijes, si dhe aktivitete akademike dhe historike në Shkodër për të njohur më mirë këtë figurë.
Një kritikë e veçantë i drejtohet Universitetit të Shkodrës, i cili mban emrin e Gurakuqit, por nuk ka ndërmarrë asnjë iniciativë strategjike për të reflektuar mbi misionin e tij mes universiteteve shqiptare dhe europiane. Sipas Bushatit, historia nuk është thjesht një rrëfim i së kaluarës, por një mësim për të ardhmen, ndaj është e nevojshme një politikë kombëtare që nderon figurat e shquara dhe trashëgon vlerat e tyre tek brezi i ri.
Këto kritika vijnë nga një figurë që, pas përjashtimit nga Partia Socialiste për shkak të qëndrimeve të tij mbi çështjet e Kosovës dhe krizën politike, po flet për herë të parë me një ton kaq të ashpër ndaj qeverisë.
