Dy anëtarë të stafit të Komitetit Ndërkombëtar të Kryqit të Kuq, Ibrahim Eid dhe Ahmad Abu Hilal, humbën jetën të shtunën pas një sulmi në shtëpinë e tyre në Khan Younis, në jug të Rripit të Gazës. Lajmi u konfirmua nga vetë organizata, e cila theksoi dhimbjen për humbjen e dy kolegëve dhe kërkoi sërish mbrojtje për civilët në Gaza.
Pas një armëpushimi që zgjati rreth dy muaj, Izraeli rifilloi operacionet ushtarake në mesin e marsit dhe i intensifikoi ato që nga 17 maji, duke deklaruar si objektiv shkatërrimin e Hamasit, lirimin e pengjeve të mbetura dhe marrjen nën kontroll të plotë të enklavës.
Nga 251 pengjet e rrëmbyera nga Hamasi më 7 tetor 2023, 57 mbeten ende në Gaza. Autoritetet izraelite dyshojnë se të paktën 34 prej tyre kanë humbur jetën.
Sipas të dhënave të Ministrisë së Shëndetësisë të drejtuar nga Hamasi – shifra të cilat pranohen si të besueshme nga OKB-ja – mbi 53,930 persona, shumica civilë, janë vrarë në Rripin e Gazës.
