Saimir Ustabeqiri, kreu i Shoqatës së Paratetraplegjikëve në Shkodër, ka hedhur sot një hap të rëndësishëm drejt përmbushjes së ëndrrave të tij. Ai përfundoi me sukses provimin e fundit të maturës shtetërore në gjimnazin “Jordan Misja”, duke mbyllur kështu një kapitull që kishte mbetur i papërfunduar për vite me radhë.
Pavarësisht kufizimeve fizike, Saimiri ka treguar se kur ka vullnet, çdo sfidë mund të përballohet. Me këtë etapë tashmë të përfunduar, qëllimi i tij i radhës është të vazhdojë studimet e larta në degën “Punë Sociale” pranë Universitetit “Luigj Gurakuqi”.
Historia e tij është një frymëzim i vërtetë për të gjithë ata që përballen me vështirësi, por që nuk dorëzohen përballë jetës.
