Pavarësisht humbjes 1-2 ndaj Skënderbeut në shtëpi, humori te Vllaznia nuk është ulur. Shkodranët kanë analizuar në detaje disfatën dhe tashmë janë të përqendruar te ndeshjet e radhës, me synimin për të mbyllur sezonin në mënyrën më pozitive të mundshme. Humbja ndaj një ekipi të fundit të tabelës nuk është parë si dramë, por si një motivim për të reaguar në sfidat e ardhshme.
Sfida e radhës do të jetë kundër Egnatias, ku Vllaznia kërkon një reagim të fortë në transfertë ndaj kampionëve në fuqi. Objektivi i skuadrës shkodrane është të tregojë ambiciet dhe pretendimet e saj për këtë sezon, duke synuar rezultate të rëndësishme në fazën përfundimtare.
Ekipi i Brdariç është tashmë në gjysmëfinalet e Kupës së Shqipërisë dhe në garë për “Final 4” të kampionatit. Me vetëm gjashtë ndeshje të mbetura në edicionin e rregullt, Vllaznia është e përqendruar te “play-off”-i, duke synuar sa më shumë rezultate pozitive për të siguruar një pozicion të favorshëm në fazën finale./RealitetiPost/
