Një grup kriminal që kishte si specialitet trafikun e armëve, municioneve dhe tritolit është goditur nga policia e Tiranës në bashkëpunim me prokurorinë e kryeqytetit.
Gjatë hetimeve të kryera për këtë linjë trafiku është zbardhur dhe një ngjarje kriminale e ndodhur në Tiranë, ku i është vendosur tritol noteres Esmeralda Dauti.
Për këtë ngjarje janë arrestuar dy persona.
Krimi i rëndë ka ndodhur 5 ditë më parë.
Ndërkohë mësohet se armë të llojeve të ndryshme transportoheshin nga Kosova në drejtim të Shqipërisë, duke u shitur me çmime të ndryshme që varionin nga 1 deri në 5 mijë euro.
Gazetari i “Ora News” Elton Qyno ka mësuar se në total janë arrestuar 6 persona, ku dy prej tyre ndodheshin në burg për vepra të tjera penale dhe se arresti i tyre është ekzekutuar në ambjentet e burgut.
Mes personave të arrestuar ka dhe shtetas kosovarë.
Ndërsa 4 të tjerë janë arrestuar mbrëmjen e djeshme për akuzën e “Trafikimit të armëve dhe lëndëve shpërthyese”.
Gjatë aksionit policia e Tiranës ka sekuestruar disa armë.Ndërsa në një bazë të grupit është sekuestruar një sasi e madhe me kallëpë tritoli.
Tritoli dhe armët hynin në Shqipëri nga Kosova dhe shiteshin në tregun e brendshëm me ccmime të ndryshme.
Tritoli u shitej anëtarëve të grupeve kriminale në disa qyteteve të vendit.
Pritet që në vijim policia e Tiranës të zhvillojë një konferencë për shtyp për të dhënë detaje konkrete nga ky operacion,mënyrën e organizimit dhe emrat e personave të arrestuar.
