Një megaoperacion i drejtuar nga SPAK vuri në pranga 20 persona dhe zbërtheu disa prej ngjarjeve të bujshme kriminale në vend.
Shtatë grupe kriminale u goditën, ndërsa në pranga ranë 14 persona në Shqipëri dhe 6 të tjerë jashtë vendit.
Në qendër të këtyre grupeve kriminale është grupi kriminal i krijuar dhe drejtuar nga shtetasi Ervis Martinaj, i cili ishte në aleancë me grupin kriminal që vepron në qytetin e Lezhës të drejtuar nga shtetasi Arben Ndoka.
Këta dy grupe kriminale, për arritjen e qëllimit kriminal kanë kontaktuar anëtarë të një grupi tjetër kriminal i cili vepronte në qytetin e Durrësit.
Gjithashtu, të dy këto grupe kriminale kanë rekrutuar vrasës me pagesë të cilët veprojnë kryesisht në zonën e Fushë – Krujës dhe në zonën e Burrelit.
Po kështu për të realizuar qëllimet kriminale Ervis Martinaj ka kontaktuar dhe shtetasin Viktor Imeri, i cili sapo kishte përfunduar vuajtjen e dënimit me burgim. Ai i kërkoi vrasjen e shtetasit F.H.
Në ndihmë të grupeve kriminale të drejtuara nga Ervis Martinaj dhe Arben Ndoka kanë qenë edhe shtetasit Emiljano Shullazi dhe A.A., të cilët edhe pse në kushtet e paraburgimit, kanë ndihmuar Ervis Martinaj dhe Arben Ndokën në realizimin e qëllimit kriminal, që ishte vrasja e Durim Bamit.
