Drejtoria e Përgjithshme e Shërbimeve të Transportit Rrugor ka dalë me vendim që, duke filluar nga data 1 Qershor, të gjithë drejtuesit e mjeteve që humbin të gjitha pikët do të rifuten në kursin e praktikës dhe do i nënshtrohen testit teorik për të rifituar lejen e drejtimit.
Në vendimin e sotëm,kjo drejtori ka krijuar lehtësira për marrjen e një leje drejtimi për një kategori tjetër mjetesh, si dhe ka vendosur çmim dysheme për të gjithë autoshkollat, me qëllim shmangien e konkurrencës së pandershme.
“Drejtuesit e mjeteve rrugore që humbin të gjitha pikët e patentës, e cila iu hiqet për shkelje të rënda e të përsëritura, do t’i nënshtrohen kursit nga e para në autoshkollë për të rimarrë sërish lejen e drejtimit. Procedura është e njëjtë me herën e parë. Fillimisht do t’i drejtohen autoshkollës në fund të së cilës i nënshtrohen një testi teorie të veçantë.
Do të jenë 30 pyetje, të gjitha nga kapitulli i normave të sjelljes, nga i cili do të mund të kalojnë në fazën tjetër jo me katër, por maksimalisht me tri gabime. Më tej, ndonëse mund të kenë qarkulluar më herët në rrugë, ata do t’i nënshtrohen edhe testit të praktikës pranë DPSHTRR.
Ata që duan të ngasin një ciklomotor, do të duhet të futen në testim gjithashtu, gjë që më parë nuk nevojitej. Bëhet fjalë për ciklomotorat, kategoria AM (deri 50 ç, jo mbi 45 km/h), që DPSHTRR shton se ka ardhur si kërkesë e Direktivave EU dhe e Marrëveshjeve të Njohjeve dhe Konvertimit të lejedrejtimeve. Risia tjetër e udhëzimit, që pritet të hyjë në fuqi në 1 qershor, lidhet me autoshkollat.
Ato nuk mund të operojnë me çmime nën një vlerë të caktuar që do ta përcaktojë Drejtoria në fund të çdo viti, pas një koordinimi zyrtar me përfaqësuesve të autoshkollave. Veç vlerës monetare dysheme, edhe materialet didaktike, manualet e përgatitjes teorike dhe praktike, fizike e virtuale, do të unifikohen.
“Disiplinimi i lejes së aktivitetit për hapjen e autoshkollave të reja në rang bashkie apo qarku sipas numrit të popullsisë, forcim i rolit dhe përgjegjësisë së drejtuesit teknik të autoshkollës, ulje e moshës së mjeteve që i shtohen në vijim flotës së autoshkollimit”, nënvizon DPSHTRR në njoftimin e saj, teksa shton se zbatimi i këtyre ndryshimeve të parashikuara në udhëzim do të nisë jo më vonë se 1 qershori.
