Vllaznia siguroi tre pikë të arta në Kamzë. Goli i Liridon Latifit riktheu ekipin e Thomas Brdaric te fitorja pas katër barazimeve radhazi në kampionat. Trajneri gjerman vlerësoi ndeshjen e djemve të tij në “Gol pas Goli” në Supersport, ku ndër të tjera tha:
“Pikë së pari jam i kënaqur me qëndrimin e lojtarëve të mi, është shumë e vështirë të luash futboll në kushte të tilla. Sot shfrytëzuam një mundësi të mirë, morëm tre pikët dhe e merituam fitoren në çdo aspekt.
Jemi akoma një ekip në proces, që kërkon përmirësimin pas çdo ndeshje që luan. E dimë shumë mirë që për të fituar duhet të fitojmë. Shënuam dhe patëm një performancë të shkëlqyer në mbrojtje, mbrojtësit tanë luajtën fort dhe na ndihmuan për të marrë tre pikët.
Shikojmë ekipin tonë jo vetëm kundërshtarin përpara se të futemi në fushë, por edhe vetëbesimin e lojtarëve, Aralica pati minutat e veta, duam t’i japim kohë për t’u rikthyer në formën më të mirë. Ekipi im ishte i balancuar sot.
Nuk po ankohemi. Fusha nuk dukej keq nga jashtë, është jeshile, por nga brenda ishte me gunga. Nuk ishim shumë dakord me disa nga vendimet e gjyqtarëve anësore dhe ai kryesor, nuk ishin të sakta.
Kartoni i kuq i Adilit? Adili tha se futbolli ka vdekur? Kur të gjithë ne kemi përgjegjësi, kemi edhe presion, sepse duam të marrim rezultat të mirë. Duhet të jemi më të qetë me disa vendimet, sepse çdo gjë ka një impakt. Nuk dua të ankohem për gjyqtarët, e di se ata kanë punë të vështirë, duhet të marrin vendime të vështira.
Nuk mendoj se qëndronte kartoni i dytë i verdhë, mbase donte të kompensonte penalltinë tonë. Nuk kishte pse të shkonte te VAR-i, ishte penallti e pastër. Jemi ekip i fortë, mund të luajmë për disa momente edhe me dhjetë lojtarë.
Nuk janë të gjithë rrethanat njësoj, unë e dua punën që bëj, por jo gjithmonë është e thjeshtë të përballosh situata. Ndoshta ndonjëherë do të bëhem unë gazetar dhe ti trajner, që të kuptosh punën që bëj unë.
E di se njerëzit më shikojnë dhe më marrin si shembull, kështu që duhet të përmbahem ndonjëherë. Kam vlerësim maksimal për njerëzit me të cilët punoj. Në studio është më nxehtë se këtu”, përfundoi trajneri i skuadrës shkodrane.
